بيتزا حلوة

اليوم جبت ليكوم وصفة ساهلة و اقتصادية و يمكن ليك تنوعي فيها كما بغيتي. هي فالحقيقة، الفكرة شفتها فواحد المدونة فرنسية ولكن أنا بدلت فيها و درتها بطريقتي.
المهم، هاد البيتزا الحلوة راه بحال المالحة غير كتزيدي الفانيل فالعجينة. ولكل سيدة طريقتها فعجينة البيتزا

  الطريقة اللي كندير كالتالي:
كناخد1 بيضة،1 م ك زيت العود، 1 م ك زبدة رطبة، 2 م ك سنيدة، م ص مركز فانيل، م ص خميرة ديال الخبز، م ص خل، دقيق. كنعجن بماء دافيء حتى تولي العجينة لينة كنغطيها و نخليها تخمر نصف ساعة

من بعد، كنكورها على شكل كرصة. كندهن لاطة ديال الفران، كنحطها فيها و كنبدا نكرص حتى تولي رقيقة. من بعد كنثقبها بالفورشيط مزيان باش ما تنفخش لينا و كندهنها بالزبدة دايبة مزيان، كنقطع الفواكه الي عندي و كنستفهوم فوق العجينة. كنخلط شوية فانيل مع السنيدة و كندردها فوق الفواكه باش يتكرامليزاو و تكون نكهة زوينة. كنزيد شي مربعات ديال الزبدة من الفوق و ندخلها طيب فالفران بحال البيتزا العادية.