السلام عليكم و رحمة الله و بركاته
كيما شفتو فالعراضة كنا عملنا السفة بالدجاج محمر
و نزولا عند طلب بعض الاخوات قررت نزل ليكوم طريقتنا انا والوالدة باش كنصايبوها
بصراحة تعاونا عليها الوالدة الله يخلي ليها صحيحتها صايبات السفة و انا صايبت الدجاج و عسلت الزبيب و بالطبع التقديم
نبداو بالدجاج
خدمت بنفس الطريقة لي كندير بيها الدجاج محمر
طريقتي غتلقاوها فهاد الرابط
وبالطبع بدون اضافة الزيتون والحامض
بالنسبة للسفة كتاخدي الكمية لي بغيتي كديريها فقصعة و دهنيها بالزيت كاملة خاص يوصلها كلها ماتكونش بلاصة مدهومة و بلاصة لا و ماتنساوش راه ايلا مادهنتيهاش مزيان بالزيت كتكور
كديريها فكسكاس و تعملي الما فالبرمة وماتنسايش تعملي شي طريف الحامض و لا طريف الخبز فالبرمة باش ماتكحالش ليك
صافي كتشعلي عليها
خاص يتقفل عليها مزيان و تغطيها باش دغيا تفور
كتاخد من 20 حتى ل 30 دقيقة فالفورة الاولى و نتوما عينيكوم ميزانكوم
فاش كتفور كتخويها فالقصعة و ترشيها بشوية الماء ماتكتريش بزاف و حليها مزيااااااااااان
رجعيها للكسكاس تفور للمرة الثانية بنفس الطريقة
كنعاودو العملية مرة ثالتة
و فالمرة لرابعة كنعملو ليها الملح و الزبدة من الاحسن ديال العبار كتجي الذ
و كتفور اخر مرة
بالطبع خاصك ذوقيها باش تاكدي
صافي كضيفي ليها الزبدة مرة اخرى هي بصراحة كتلددها و ترطبها و لكن الناس لي عندهوم مشاكل صحية و لا متبعين حمية غذائية كيخصهوم يتكايسو و مايكتروش منها بزاف و نضيفو ايضا 2 م ك سكر كلاصي و نخلطو مزيان
المهم كنحطو القياس لي بغينا فطبق التقديم
كنسقيو الوسط بديك الدغميرة دالدجاج لي بقات ولكن خاصها تكون واقفة تماما و ديري غير الوسط
كتحطي فوقها الدجاج محمر لي خارج مباشرة من الفرن
انا هنا عملت واحد الدجاجة و قسمتها على 2 حيت درنا 2 حطات
و كتزوقي بالزبيب معسل
بالطبع كلشي كيعرف يعسل الزبيب ولكن لاباس من التذكير
كنعملو الكمية لي بغينا انا عملت شي نص رابعة هنا مع كاس الما او اكتر و 3 م ك سكر
و تخليهوم يطيبو حتى يتعسل الزبيب و يختر الما يولي بحال العسل كنضيفو القرفة و نطفو عليه
فطبيسيل صغير كنديرو شوية مازهر و فطبيسيل اخور شوية قرفة مدقوقة مزيان
كندوزو الكاس فمازهر تم فالقرفة و كنحطوه على السفة باش نرسمو دوائر
كنعملو 4 او 5 حسب الرغبة
كنعمرو هاد الدوائر بالزبيب معسل
و نكملو التزيين بالبرقوق معسل و اللوز مقلي و سكر كلاصي فالجناب
بصراحة كتجيي لذيذة جدا بشهادة الجميع
جربوها و ردو عليا الخبار وادا كان اي استفسار انا في الخدمة
كنتمنى ليكوم شهية طيبة
ليست هناك تعليقات:
إرسال تعليق
تعليقاتكم تسعدنا