السلطة لي عملت فعراضتي بالتفصيل الممل

السلام عليكم و رحمة الله و بركاته

مساء الفل والياسمين

نزولا عند طلب صديقتي اقبال غنزل ليكوم الطريقة بالتفصيل الممل هههه للسلطة لي عملت مؤخرا

انا صايبت السلطة على مرحلتين باش نربح الوقت

ليلة العراضة عملت الارز يتسلق 

درت 3 كيسان و نصف دالارز مع 8 كيسان دالماء و م ك زبدة و شوية الملح فطنجرة الضغط و خليتو طاب مابين 25 دقيقة حتى ل  30

فالكسكاس ديال طنجرة الضغط عملت الخيزو اي الجزر و البطاطا منقيين مغسولين و مقطعين طريفات صغار باش يتفورو فنفس الوقت فاش كيطيب الروز

هاكدا كنربحو الوقت حيت كيطيبو بزوج فخطرا وحدة

فهاد الاثناء درت 3 فلفلات كبار يتشواو

خديت 3 الباربات سلقتهوم بقشرتهوم فشوية الما

و سلقت كدلك 3 البيضات

نقيت الفلفة مزيان و قطعتها طريفات رقاق و طوال

عملت معاها شوية زيت الزيتون خل ملح كمون و ابزا

انا موالفة كنعمل معاها حتى ضريس دالتومة محكوك و المعدنوس مقطع كتجي غزالة و لكن خفت لا الضياف ماتعجبهوم بالتومة فمادرتهاش

ايوا درتها فبواطة و خليتها  فالثلاجة

فاش طاب الروز و الخضر

عملت الجزر و البطاطا فبواطات و عملتهوم فالثلاجة و الروز عملتو فالكسكاس و خويت عليه الما و انا كنحرك باش يبقا ليا مفروق

و عملتو حتى هو فالثلاجة

هادي كانت المرحلة الاولى

فاش قرب وقت التقديم

خديت داك الارز و ضفت ليه بواطة ديال الذرة و بواطة ديال الطون و 3 معالق كبار ديال المايونيز و خلطت مزيان

عملت نصف الخليك فمول ديال الكيك كول دائري فيه فراغ فالوسط

قاديتو مزيان و قلبتو فصحن التقديم

خيزو شرملتو فمقلة مع ضريس صغير دالتومة محكوك شوية المعدنوس زيت الزيتون ابزار ملح و كمون و حركتو مزيان

و حطيتو ف 2 دالجوانب فكل صحن

البطاطا مفورة هي و الباربا لي نقيتها و قطعتها درت ليهوم  - م ك مايونيز معلقة كبيرة زيت الزيتون - شوية خل - م ص ماء كمون و خلطت مزيان حتى تجانسو - و تبلت بيه كل من البطاطا و الباربا و ستفتهوم حتى هوما فطبق التقديم

الخس غسلتو مزيان سقطرتو و رشيت عليه نقيطات الخل و زينت بيه الطبق

قطعت شوية دمطيشة تقريبا شي 5 او 6 كبار تقطاع صغير و تبلتهوم ملح زيت و كمون

عملت شوية فالجانب و شوية فالوسط دالاطباق و عملت فوقهوم الفلفة المشوية لي كنت موجداها

الخيار مغسول منقي غير النص و مقطع خليتو طبيعي بدون اضافات و حطيت حتى هو

زينت بمطيشات صغيورين و مقسومين على 2

داكشي لي بقى ليا ديال خليط المايونيز باش تبلت الخضر صبيتو على الارز من الفوق

و زينت بالبيض مسلوق منقي و مقطع من الفوق

نتمنى نكون توفقت فالشرح ديالي

وبصراحة هي كتاخد الد شوية داكشي علاش كنوجد داكشي فالليل باش نهار العراضة يبقى لي الوقت لاشياء اخرى

شهية طيبة ولا تحرموني من تعليقاتكم الطيبة