السلام عليكم و رحمة الله و بركاته
جمعة مباركة لكل المسلمين و المسلمين
البنات المبتدئات غالبا ماكتصدقش ليهوم الكيكة يا اما ماكاتجيش منفوخة يا اما كتفرتت او كتحرق
وبصراحة ماشي غير المبتدئات حتى الحادكات مرة مرة كتخسر ليهوم هههه
ايوا فجميع الحالات ماكاين لاش تقلقو
مانجحاتش الكيكة ماتلوحيهاش عندي ليك الحل
باش تعملي منها ديسير لذيذ جدا كتحتاجي ل
قطع من الكيك
انا هنا كنت صايبت كيك بالكاكاو الساعة ماتنفخاتش حيت طفيت عليها وسط الطياب و مشيت تغديت هههه ايوا كسكسو ماكايتسناش
ولتحضير الكريم او المهلبية
كاس حليب بودرة
ملعقتين كبيرتين نشا
ملعقتين كبيرتين سكر سنيدة
نصف لتر ماء
فانيل - 2 ساشيات
كنخلطو هاد المقادير كلها فكاسرولة بواسطة طراب يديوي مزيان حتى تمتزج الكونات
نحطوها فوق عافية مهيلة مع التحراك المستمر حتى يعقاد الخليط و نحصلو على كريم
نوجدو الكويسات فاش غنعملو الديسير
نوجدو كاس كبير او زلافة ديال قهوة
نغمسو فيها طريفات دالكيك و نعملوهوم فالكويسات
نغطوهوم بالكريم لي وجدنا
نعملو طبقة اخرى بنفس الطريقة
و فالاخير نزينو بالشكلاط فيرميسل
ندخلو الكويسات للثلاجة حتى يبردو مزيان
خاص يبقاو على الاقل ساعتين
ايوا عطيوني رايكوم فالموضوع هههه واش عجباتكوم الفكرة او عندكوم فكرة اخرى حتى نتوما
وبالصحة و الراحة
ليست هناك تعليقات:
إرسال تعليق
تعليقاتكم تسعدنا