كاطو كلاصي بنكهات مختلفة

السلام عليكم و رحمة الله و بركاته

كيف عاملين اش خباركوم غبرت عليكوم ههه ايوا هانا رجعت الحمد لله و مارجعتش بيديا خاويين هههه

هادا كاطو كلاصي لي عملت مؤخرا بمناسبة نجاحي الحمد لله فامتحانات ولوج مراكز تكوين الاساتذة

ايوا قلت مافيها باش نشارك معاكوم الوصفة و حتى الفرحة ديالي

اولا بحثت فالنت عن الافكار و لقيت مجموعة كثيرة من الوصفات و لي حازت على اعجابي اكثر هي الوصفة ديال ام اسامة و ايمان الله يعطيها الصحة و يجازيها كل خير

خديت منها شي حاجة و بدلت و غيرت كيما العادة

دابا نمرو للطريقة بالتفصيل

اول حاجة وجدت جنواز خفيفة

المقادير \ 3 بيضات - كاس  سكر سنيدة - كاس دقيق - 1 ساشي فانيل

الطريقة \ كنطربو  بالطراب الكهربائي البياض دالبيض مع نصف كاس سكر سنيدة و سافي فانيل حتى يطلع مزيان 

ثم نطربو صفار البيض مع شوية ملح و النصف الاخر دالسكر سنيدة مزيان 

نبداو نضيفو بياض البيض لي طلعنا على الصفار و نخلطو غير بشوية 

نزيدو الدقيق مغربل غير بالطراب اليدوي و غير بشوية باش ماينزلش لينا البيض

نخويو الخليط ديالنا فمول كبير مغطي بورق الزبدة المدهون 

ندخلوه للفرن على درجة حرارة 160

نردو البال مع الجنواز حيت دغيا كطيب

فاش نخرجوها نخلوها تبرد شوية ثم نقطعو الشكل لي بغينا

انا عملت شكل مربع على حساب الاطار لي عندي

نسقيو الجنواز باش ترطاب

انا استعملت كونفتير الماندرين مخفف بالماء باش نسقيها

الطبقة الثانية

المقادير \ باكية دالكريم شانتيي بودرة - حك نسلي - ياغورت فانيل - ياغورت فريز - رابعة حليب بارد - قشرة حامضة خضرة محكوكة - م ص قهوة سريعة الذوبان

الطريقة

كنطلعو الكريم شانتيي باضافة رابعة الحليب للبودرة و خفقها بالطراب الكهربائي الى حين الحصول على شانتيي واقف

نضيف الحك د نسلي و ياغورت فانيل و نخلطو بسرعة متوسطة غير شوية حتى تجانس المكونات

نقسمو الخليط على 3

الجزء الاول ضفت ليه ياغورت الفريز

الجزء الثاني ضفت ليه قشرة الحامض

الجزء الثالت ضفت ليه شوية القهوة لي دوبت مع م ص ماء

كناخدو الجزء الاول و نعملوه فوق الجنواز ثم ندخلوه للكونجيلاتور ربع او نصف ساعة حتى يشد فراسو

نضيفو الخليط الثاني و نعملو نفس الشيء

نضيفو الخليط الثالت و ندخلوه مرة اخرى

الطبقة الثالتة

المقادير \ كاس سكر سنيدة - ياغورت فانيل

حبات فريز للتزيين

الطريقة

نعملو السكر يدوب و يتكاراميليزا على عافية مهيلة

نضيفو الياغورت و لكن حذاري خاصكوم تبعدو وجهكوم باش ماترش عليكوم

نحركو و نسدو عليه باش يدوب السكر لي تحجر

نخلوه يبرد شوية و نعملوه من الفوق بعدما يكون الكاطو ديالنا قساح مزيان يعني يكون دوز شي 3 سوايع فالكونجيلاتور

ندخلوه تاني من بعدما نديرو الكراميل من الفوق

 

 

حتى يجي وقت التقديم عاد كنزوقو بالفريز لي سبق لينا غسلنا و قطعنا

نصيحة خرجوه قبل التقديم بدقائق معدودة باش يبقى قابط فراسو و مايديعش الكريم

و بالصحة و الراحة