الأحد، 29 ديسمبر، 2013

طورطة بالفريز

السلام عليكم و رحمة الله و بركاته

هادي طورطة بسيطة بزاف ولكن حبيت نشاركها معاكم

اولا وجدت الجنواز
المقادير
كاس سكر \ 4 بيضات \ ملح \ ساشي فانيل \ نص كاس ماء ساخن \ ربع كاس زيت \ 2 كيسان دقيق مغربل \ 2 خمارات

الطريقة
نطربو البيض مع قبيصة الملح و نبقاو نضيفو السكر شوية بشوية و حنا كنطربو بالطراب الكهربائي فاش نساليو السكر نضيفو الماء الساخن و نكملو التطراب بدون توقف
نضيفو الزيت و نبداو نضيفو الدقيق غير بشوية و نحركو غير بالطراب اليدوي نزيدو الخمارات و نمزجو الخليط مزيان

نعملو الخليط فمول مدهون بالزبدة و مرشوش بالدقيق و ندخلوه يطيب ففران مسخن من قبل
فاش يطيب نطفو الفرن و نخلوه شوية عاد نخرجوه باش ماتنزلش لينا الجينواز

خاص الجنواز تبقى حتى تبرد عاد نقسموا باش ماتفرتتش لينا ولكن لازم نغطوها باش تيقى رطبة
انا وجدت 2 جنوازات و قسمت كل وحدة باش يكون عندي 4 طبقات

دابا نمرو لكريم باتسيير

نصف لتر حليب \ 3 م ك سكر \ 3 م ك بودرة كريم باتسيير

نوجدوه و نخلوه يبرد شوية

نمرو لكريم شانتيي
كاين 2 طرق
الاولى ناخدو علبة كريم فريش باردة نضيفو لها شوية شكر و نطربو بالطراب الكهربائي مزيان حتى يوجد لينا كريم شانتيي
الثانية ناخدو علبة كريم شانتيي بودرة نضيفو ليه رابعة حليب اي ربع لتر حليب بارد و نطلعوه بالطراب الكهربائي
نحتفظو بالكريم فالثلاجة لحين الاستعمال

نوجدو السيرو بالما و السكر و نسقيو الطبقة الاولى من الجنواز نعملو طبقة من الكريم باتسيير لي ضفنا ليه شوية كريم شانتيي
نعماو فوقو طبقة من الجنواز و نكملو بنفس الطريقة
 
في الاخير ناخدو رابعة فريز نقطعوه و نطحنوه مع شوية السكر و الما
نعملوه يغلي و نضيفو ليه فلان بالفريز
نخلوه يبرد شوية و نعملوه من الفوق غير بشوية
 
نزوقو بالشانتيي من الجناب و ندخلو الطورطة للثلاجة تبرد عاد نقدموها
 
كيما قلت هي جد بسيطة  و تصلاح لكوتي عادي   


الجمعة، 27 ديسمبر، 2013

شنيك سهل و لذيذ بعجينة العشر دقائق

السلام عليكم و رحمة الله و بركاته

درتو الكوتي ولا مازال هههه ايوا هادو شنيكات لداد و ساهلين يستاهلو فمكوم

هادا شنيك بعجينة العشر دقائق

كنظن الكل كيعرف يعملها و لكن لاباس بالتذكير

هنا تلقاو طريقة العجينة بالتفصيل

كنضيفو للعجينة النكهة لي حبينا انا هنا ضفت ساشي بنكهة زهر البرتقال كيجي رائع

فاش تخمر العجينة كنسرحوها بالمدلك و ندهنوها بالزبدة نرشو بالسكر و شزية زبيب مغسول و منشف

نروليو العجينة و نقطعو 

نعملو الشنيك فلاطات مدهونين  ندهنوهوم بصفار البيض و ندخلوهوم يطيبو

فاش يقربو يطيبو نضيفو اللوز ايفيلي و نرجعو الشنيك يكمل طيابو

فالاخير نخرجوهوم  و ندهنوهوم بالمربى
انا استعملت مربى المندرين 


يمكن تغبروهوم بسكر كلاصي او تخلوهوم هاكداك كيجو روعة مع شي كويس د اتاي او قهوة

بالصحة و الراحة

السبت، 21 ديسمبر، 2013

فلفلة مشوية

السلام عليكم و رحمة الله و بركاته

صباح النور على الجميع

هادي الفلفة مشوية لي كنحماق عليها هههه كنظن الكل كيعرف يوجدها لكن لاباس من التذكير هههه

ناخذ الفلفلة حلوة انا هنا استعملت الفلفلة حمرا
نشووها فشواية فوق نار متوسطة
نعملوها فبلاستيك غذائي و نخلوها تبرد
نقوها من القشرة
نقطعوها و نقوها من البذور
نضيفو قطرات من الخل زيت الزيتون حسب الرغبة شوية ثوم محكوك ملح كمون ابزار
يمكن اضافة المعدنوس مقطع رقيق و قطرات من عصير الليمون الحامض
من الاحسن تحضير قبل بساعات كتكون الذ 
مممم
شهية طيبة