السلام عليكم و رحمة الله و بركاته
كنظن الكل كيعرف يحضر الكيكة الباردة ولكن مافيها باس نشارك معاكوم هاد الوصفة الرائعة
بصراحة انا كنعمل الكيكة الباردة من سنوات و لكن مؤخرا شفت واحد الطريقة زوينة فواحد المنتدى مغربي الله يجازي كل خير مولاة الفكرة الرائعة
اولا كنحضرو كيكة رقيقة او كيكة عادية و نقسموها
انا استعملت 1 بيضة - نصف كاس سكر - ربع كاس زيت - 2 م ك كاكاو - نصف خمارة و الدقيق حسب الخليط تقريبا كاس
كنخلطو المقادير و نعملوهوم فمول مدهون بالزبدة و مرشوش بالدقيق
فاش كطيب نخلوها تبرد مزيان انا عملتها ليلة قبل
من بعد و جدت كريم باتسيير
نصف لتر حليب - 3 م ك كريم باتسيير - 1 بيضة - 80 غ شكلاط مدوب - كاس لوز محمر و معرمش - 3 م ك سكر
كنطربو البيضة مع السكر و الغبرة دكريم باتسيير نزيدوهوم على الحليب و نحركو دون انقطاع حتى يعقد
نضيفو الشكلاط دايب ايلا ماكاينش ضيفي 2 م ك كاكاو تم اخيرا نضيفو اللوز مهرمش و نخلطو مزيان
نخلوه يبرد شوية
نعملو الكيكة ديالنا فمول كيتحل من الجناب
نسقوها بالسيرو مزيان
نكبو الكريم لي حضرنا و ندخلوه للثلاجة يبرد
نمرو دابا للفلان
كناخدو نصف لتر حليب نضيفو ليه 2 بكيان فلان كراميل و 2 او 3 م ك سكر حسب الذوق
نخلو الخليط يغلى مع التحريك حتى يوجد
نخلوه يبرد شوية
نكبوه على الكيكة ديالنا نتسناو شوية حتى يبرد و ندخلوه للثلاجة مرة اخرى ساعة او ساعتين
نوجدو الطبقة الاخيرة
كلاساج دالشكلاط
انا هنا استعملت الشكلاط لي دبت فحمام مريم تقريبا 12 شكلاطة مع ربع كاس ما و م ك سكر حتى غلاو خليتهوم دفاو شوية و كبيتهوم غير بشوية فوق الكيكة الباردة و رجعتها للثلاجة
دوبت شوية الشكلاط و عملت منو الاشكال باش زوقت من الجناب و الفوق
قبل التقديم عملت شوية الكراميل للوسط و زوقت بحبيبات و فيرميسيل الشكلاط
وهادي النتيجة
شهية طيبة
ليست هناك تعليقات:
إرسال تعليق
تعليقاتكم تسعدنا