الأربعاء، 18 سبتمبر 2013

طورطة بكريمة الزبدة من الارشيف

السلام عليكم و رحمة الله و بركاته


  اليوم بغيت نشاركوم بهاد الطورطة المتواضعة. كانت اول تجربة ليا مع كريمة الزبدة. كنت خايفة تجي ثقيلة بزاف داكشي علاش اكتفيت بتزيين الطورطة بها من الفوق صافي. و كان اختيار صحيح حيت هي كتجي زوينة و لكن ثقيلة. من الاحسن مانكتروش منها.

و الان بسم الله


  هاد الحلوة كنحتاجو جنواز / كريم باتيسيير + قطع شكلاط للتزيين + كريم الزبدة


مقادير الجنواز

   اربع بيضات +قبصة الملح + 9 م ك سنيدة + 9 م ك دقيق مغربل + م ص خمارة الحلوى

  نخلطو البيض + الملح و السكر بالطراب الكهربائي مزيان من بعد نضيفو الدقيق و الخميرة و نخلطو بشوية.


نكبو الخليط فلاطة مدهونة بالزبدة و مرشوشة بالدقيق. 


ندخلوها لفران سخون من قبل. 


       فاش تخرج نخلوها تبرد مزيان. من الاحسن نديروها فالصباح الا بغينا نستعملوها العشية. 



  نقسمو الجنواز على 2


 نسقوها بالسيرو


  نوجدو كريم باتيسيير (انا ضفت ليه نكهة الخوخ جا غزال) كنظن الكل كيعرف يوجدو و لي عندها استفسار انا في الخدمة.
   نخلو الكريم يبرد و من بعد نوضعوه على الطبقة الاولى دالجنواز.



 نديرو شوية الكركاع و الشكلاط مفتت
 
  نوضعو الطبقة الثانية من الجنواز 
نسقوها بالسيرو 
نغطو بالكريم باتيسيير 
نوضعو قطع الشكلاط فالجوانب 



دابا ندوزو لكريم الزبدة باش غنزينو 
        نوجدو سيرو كثيف . تقريبا 120 غ سكر مع شوية الما. نخلوه يغلي مزيييييييان
    ناخدو 2 بيضات كبار نطربوهوم شوية و نبداو نضيفو السيرو لي حصلنا عليه شوية بشوية و حنى كنطربو بالطراب الكهربائي.

   من بعد نبداو نضيفو الزبدة (125 غ خاص تكون لينة لازم نخرجوها من الثلاجة ساعة قبل و نقطعوها طريفات صغار) و نبقاو نخلطو حتى يتجانس الخليط مزيان ثم نضيفو الكاكاو ) الشكلاط غبرة.

   نعملو وريدات صغار و ندخلو الحلوة للثلاجة حتى تشد شوية



و بالصحة و الراحة .

ليست هناك تعليقات:

إرسال تعليق

تعليقاتكم تسعدنا