كيك بالشكلاط و الكركاع

السلام عليكم و رحمة الله و بركاته

هاد الكيك عملتو فعيد الفطر و جا غزال تبارك الله

نعطيكوم المقادير و الطريقة

المقادير

 اربع بيضات \ قبيصة ملح \ 2 كيسان سكر \ كاس زيت \ كاس ياغورت \ فانيل \ كاس ماء \ 5 م ك كاكاو مسوس \ ساشي كاكاو اديال 7 غ \ 4 كيسان دقيق مغربل \ 3 خمارات \ م ص خل \ كاس و نص كركاع مهرمش

الطريقة
نطربو البض الملح السنيدة و الفاني بالطراب الكهربائي مزيان ثم نضيف الزيت و نكملو التطراب
نضيفو الياغورت تم الماء و نطربو
نزيدو الكاكاو و الدقيق و نخلطو غير بالطراب اليدوي غير بشوية
ثم الخمارات حتى هوما مغربلين و الخل و نخلطو
الكركاع هو الاخير كنضيفو ليه معلقة دالدقيق و نخلطو مزيان عاد نضيفوه للكيك باش ماينزلش للتحت
المول فاش عملت الكيك القطر ديالو 32  و بالطبع كان مدهون بالزبدة و مرشوش بالدقيق مزيان
كطيب الكيك ففرن متوسط الحرارة

نا هنا عملت تقريبا شي 20 مربع شكلاط يدوب مع نص كاس ما و مع سنيدة  و ساشي قهوة سريعة التحضير
من بعد ضفت ليه 2 ياغورت شكلاط ديال درهم خلطت مزيان
الخليط كان سائل شوية خويت منو غير شوية على الكيك باش يتشربو
و الباقي زدت ليه م ك مايزينا و حركت خليتو عقد شوية و طفيت عليه و قاديتو فوق الكيك
زينت بالكركاع و الشكلاط ابيض صديفات ههه

خليت الكيك بات فالثلاجة
تشرب الشكلاط مزيان و برد جا غزال مممم
بالصحة و الراحة
جربوه و ردو عليا الخبار